Вітаем Вас на старонцы Фонда развіцця мясцовых супольнасцей (CMDF). Фонд быў заснаваны напрыканцы 2009 года для садзейнічання прагрэсіўнай трансфармацыі беларускай грамадзянскай супольнасці. Ён аб'ядноўвае намаганні цэлага шэрагу міжнародных арганізацый з вялікім досведам працы ў Беларусі. Дзейнасць Фонда здзяйсняецца няўрадавай некамерцыйнай арганізацыяй Pact, Inc пры падтрымцы Агенцтва ЗША па міжнародным развіцці (USAID). За час свайго існавання Фонд разгледзеў больш за 350 праектаў беларускіх няўрадавых арганізацый і ініцыятываў, з якіх было падтрымана больш за 50. 

Фонд развіцця мясцовых супольнасцей садзейнічае развіццю грамадскіх ініцыятываў на мясцовым узроўні, дае магчымасць грамадзянам актыўна ўдзельнічаць у вырашэнні актуальных пытанняў павышэння якасці жыцця, фарміравання каштоўнасцей і яднання супольнасці як на лакальным, так і на нацыянальным узроўні. 

Мэтай Фонда з'яўляецца пашырэнне даляглядаў грамадзянскай супольнасці, каб яна мела магчымасць уплываць на сферы жыцця, сапраўды важныя для беларускага народа. Мы рады «новым тварам» і намагаемся зрабіць Фонд дасяжным для грамадскіх ініцыятываў без досведу падрыхтоўкі праектаў. 

У 2010 годзе мы ўвялі спрошчаны парадак звароту - галоўнай стала сама ідэя заяўніка і яго матывацыя. Любы грамадзянін ці грамадская ініцыятыва могуць, не марнуючы час на папяровую працу, падзяліцца з намі асноўнай ідэяй праекта, а супрацоўнікі Фонда дапамогуць пры афармленні самых вартых з іх у праект. Гэтае новаўвядзенне павялічыла колькасць прапановаў ад грамадскіх ініцыятываў, якія раней не прымалі ўдзел у актыўным грамадскім жыцці. 

Грунтуючыся на аналізе працы Фонда, водгуках партнёраў, сітуацыі ў беларускай грамадзянскай супольнасці і новых магчымасцях для падтрымкі медыя сектара ў Беларусі, мы прынялі рашэнне накіраваць усе рэсурсы CMDF на развіццё лакальных грамадскіх ініцыятыаў.