Фонд развіцця мясцовых супольнасцей - не класічная спонсарская арганізацыя, мы разглядаем сябе ў якасці інвестара. Аб'ект нашых інвестыцый – гэта працэс паступовай трансфармацыі беларускага грамадства, бо большасць беларусаў выказвае зацікаўленасць менавіта ў прагрэсіўных рэформах. Мы імкнемся да таго, каб нашыя інвестыцыі працавалі максімальна эфектыўна. Гэта значыць: 1) патрэбы і інтарэсы мэтавай групы прадстаўлены, і 2) арганізацыі-партнёры развіваюць свой патэнцыял, забяспечваючы тым самым надзейнасць інвестыцый.

Такім чынам, наш падыход заснаваны на комплекснай працы з беларускімі партнёрамі - падтрымцы грамадскай дзейнасці і абавязковым развіцці арганізацыі. Прыярытэты такога развіцця вызначаюцца патрэбамі партнёра і, як правіла, уключаюць:

• Стратэгічнае планаванне і арганізацыйнае развіццё;
• Прафесіяналізацыя статутнай дзейнасці;
• Выпрацоўка камунікацыйнай стратэгіі, механізмаў і прадуктаў;
• Стварэнне сістэм маніторынгу і ацэнкі;
• Фінансавае і бюджэтнае планаванне і кіраванне.

Мы арыентуемся на працу з грамадзянамі, ініцыятывамі і арганізацыямі, якія падзяляюць нашае разуменне сітуацыі ў Беларусі, а менавіта:

• Місія грамадскіх ініцыятываў заключаецца не ў атрыманні палітычнай улады, а ў вырашэнні надзённых праблем мэтавай групы, мясцовай супольнасці і грамадства ў цэлым. Лідэрства ў трэцім сектары вызначаецца якасцю і эфектыўнасцю грамадскай працы, а не палітычнымі амбіцыямі;
• Беларускае грамадства знаходзіцца ў дынаміцы, у ім адбываюцца трансфармацыйныя працэсы, а гэта патрабуе пастаяннай карэляцыі падыходаў, прыярытэтаў і метадаў працы арганізацый грамадзянскай супольнасці;
• Прагрэсіўная трансфармацыя немагчымая без канкурэнцыі ідэй, іх адкрытай артыкуляцыі і публічнага абмеркавання. Трансфармацыя ідзе побач з уплывам, які немагчымы без прафесіяналізму, працы з шырокай аўдыторыяй і адкрытай, адэкватнай камунікацыі з усімі зацікаўленымі бакамі.

Сектарны падыход

Мы разглядаем грамадзянскую супольнасць Беларусі не як маналітнае адзінства з падобнымі праблемамі і патрэбамі, а як сукупнасць профільных сектараў, у кожным з якіх працуюць розныя арганізацыі, якія прадстаўляюць інтарэсы розных мэтавых груп. Умоўна можна вылучыць такія сектары, як экалагічны, сацыяльны, праваабарончы, сектар адукацыі, рэгіянальнага развіцця, СМІ, аналітычны сектар і г.д.

На практыцы гэты падыход выяўляецца ў тым, што мы імкнемся працаваць з арганізацыямі, якія разумеюць (або хочуць зразумець) сваю ролю ў тым ці іншым сектары, бачаць прыярытэт у патрэбах сваёй мэтавай групы і працуюць не толькі на карысць развіцця сваёй структуры, але і сектара ў цэлым.

Дадзены падыход адлюстроўвае нашае разуменне ўсёй разнастайнасці пытанняў, праблем і інтарэсаў беларускай грамадзянскай супольнасці, і мы імкнемся падтрымліваць тыя ініцыятывы, якія намагаюцца працаваць прафесійна і адкрыта.

Нашыя каштоўнасці

• Нейтральнасць  і прыярытэт інтарэсаў беларускага грамадства;
• Адказнасць;
• Прафесіяналізм;
• Максімальна магчымая адкрытасць і празрыстасць.

Больш падрабязную інфармацыю пра нашае бачанне сітуацыі і падыходы Вы зможаце атрымаць, скарыстаўшыся акном зваротнай сувязі. Для таго, каб атрымаць больш дэталёвую інфармацыю аб умовах звароту ў Фонд за падтрымкай, калі ласка, перайдзіце ў раздзел Даслаць праект.